“Локомотив” – “Навбаҳор” учрашувидан кейинги матбуот анжуманида “темирйўлчилар” бош мураббийи Андрей Фёдоров ўз фикрларини билдириб ўтди.
– Натижадан мамнунман. Биринчи турдаги мағлубиятдан кейин руҳий ҳолатимизни бироз тиклаб олдик. Шу боисдан иккинчи бўлимда ўзимиз кутган ўйинни оз бўлса-да кўрсата олдик. Биринчи бўлимда эса барчаси биз ўйлагандек бўлмади. Аммо шуни айта оламанки, рақиблар эмас, биз ўз вазифаларимизни ўзимиз қийинлаштирдик. Иккинчи бўлимда гол урганимиздан кейин ишимиз бироз осонлашди. Олдиндаги муҳим ўйинлар бор. Бугун керакли бўлган уч очкони қўлга киритдик. Умид қиламанки, кейинчалик чиройли ўйин кўрсатиш учун ажойиб қадам ташладик.
Анзур Исмоилов қанчалик маҳоратли ҳимоячи эканлигини яхши биласиз. У яқинда термадан келди. Миллий жамоада ўйин бироз бошқачароқ, ҳимояланиш услуби бошқачароқ. Бу ердаги ўйин эса термадагидан кескин фарқ қилади. Шу факторларни ҳам ҳисобга олиш керак. Жавоҳир Илёсовни ҳам кўпчилик яхши билади. Биз унинг маҳоратига шубха қилмаётганимиз учун асосий таркибда тушуряпмиз. Умид қиламанки, Жавоҳир ҳам бизнинг темпга мослашиб кетади.
Тимурхўжа Абдухолиқов: – Авваламбор, “Навбаҳор” жамоасини табриклайман. Улар жуда яхши ўйин кўрсатишди. Чемпионат доирасида ўз майдонимизда ҳар доим ҳам бундай темпдаги ўйинлар камдан кам бўлади. Жамоанинг ўйини анчагина шаклланган. Биринчи бўлимда улар бизни қийин аҳволга солиб қўйишди. “Навбаҳор”га омад тилайман.