🚂 Sherzod Fayziyev: “Oila davrasida zerikishga hojat boʻlmayapti”

Superliganing barcha klublari qatori “Lokomotiv” futbolchilari ham karantinni oʻz uylarida oʻtkazishyapti.

Karantin qanday oʻtayotgani, uyda nima mashqlar bajarayotgani hamda futbolni qanchalik sogʻinganini bilish maqsadida jamoamiz himoyachisi Sherzod Fayziyev bilan bogʻlandik.

– Karantindagi vaqt qanday oʻtyapti? Nimalar bilan bandsiz?
– Hamma qatori men ham karatinni uyda, oilam davrasida oʻtkazyapman. Oilamiz koʻpchilik, shu bois zerikishga hojat qolmayapti. Odatda farzandlarim va jiyanlarimni oʻynatish bilan chalgʻiyapman.

– Oʻz formangizni saqlab turish uchun qanday mashqlar bajaryapsiz?
– Jamoamiz murabbiylar shtabi har bir futbolchiga uyda bajarsa boʻladigan alohida dastur yozib bergan. Men ham shu boʻyicha individual mashgʻulot oʻtkazyapman. Jiyanlarim ham futbolchi, birgalikda toʻp tepyapmiz.

– Futbolni qanchalik sogʻindingiz?
– Judayam sogʻindim. Axir futbolga hayotimni bagʻishlaganman. Nasib qilsa tez orada yana yashil maydonga qaytamiz.

– Nima deb oʻylaysiz, karantindan keyin oʻyin ritmiga tushib olish qiyin boʻladimi?
– Bu endi karantin qachon tugashi va Superliga oʻyinlari qachondan davom etishiga bogʻliq. Hozir esa hammamiz avvalo sogʻlikni oʻylashimiz kerak. Barcha uyda qolib karantin qoidalariga amal qilsa, koronavirus balosidan shuncha tez qutulamiz.