Ўзбекистоннинг етакчи сайтларидан бири championat.asia олий лига мураббийлари, сардорлари ва мухлислар ўртасидаги якунига етаётган йилнинг энг яхшиларини аниқлади.
“Дўппи” деб номланган танловда “Локомотив” клуби устози МИРКО ЙЕЛИЧИЧ Ўзбекистоннинг 2016 йилдаги “ЭНГ ЯХШИ МУРАББИЙ” деб топилди. Сербиялик мураббий жамоани Ўзбекистон чемпионлигига олиб келди ва Ўзбекистон кубоги соҳибига айлантирди.
Йеличич сўровномада 63 баллни қўлга киритиб энг яхши бўлди. Мирко Йеличични ушбу соврин билан табриклаймиз, ажойиб йилнинг ажойиб якуни шундай бўлади десак муболаға бўлмайди.
Шунингдек, танловда ОЛИЙ ЛИГАда ўйнаётганлар орасида “ЭНГ ЯХШИ ФУТБОЛЧИ” деб Тошкентнинг “Локомотив” клуби ҳужумчиси ТЕМУРХЎЖА АБДУХОЛИҚОВ тан олинди. Футболчимиз 2016 йилги мавсумда олий лигада 22та гол уриб чемпионат тўпурарига айланди. У клубнинг Ўзбекистон чемпиони бўлишида, Ўзбекистон кубоги соҳиби бўлишида ҳамда Осиё чемпионлар лигасида чорак финалга қадар етиб боришида катта хисса қўшди.