Хабарингиз бор, Суперлиганинг 2-тур баҳсини “Локомотив” ўз майдонида ўтказади.
30 март куни “Локомотив” стадионида кечадиган беллашувда “темирйўлчилар” “Навбаҳор”ни қабул қилади. Ҳозирда бу ўйинга “Локомотив” жиддий тайёргарлик кўрмоқда. “Навбаҳор” билан кечадиган баҳс айниқса жамоа ярим ҳимоячиси Сардор Мирзаев учун муҳим аҳамият касб этади.
Негаки Сардор Мирзаев учун бу ўйин “Локомотив” сафидаги 100-учрашув бўлади. Кеча тунда терма жамоамиз билан Хитойдан қайтиб келган Мирзаев бугундан “Локо” таркибида Суперлига 2-турига тайёргарликни бошлайди.
Маълумот учун, 2009 йил “Нефтчи” сафида олий лигада дебют қилган Сардор Мирзаев 2014 йил “Локомотив”га келиб қўшилган ва биринчи даврада битта ўйинда майдонга тушган. Иккинчи давра арафасида эса у “Нефтчи”га ижарага берилган. Мирзаев 2015 йилдан бери мунтазам “Локомотив”да тўп тепиб келяпти ва шу пайтгача олий лига (Суперлига) доирасида жами 99та ўйинда иштирок этган.
У 2014 йил 1та, 2015 йил 10та, 2016 йил 27та, 2017 йил 30 ва 2018 йил ҳам 30та беллашувда майдонга тушган. Бу йил ҳисобидан эса ҳозирча 1-турда “Пахтакор”га қарши тўп тепди. Ва мана энди Мирзаев ўзининг юбилей баҳсига тайёргарлик кўрмоқда.