PEPSI Суперлигасининг 20-тури доирасида “Пахтакор”га қарши ўйиндан кейинги матбуот анжуманида “Локомотив”да бош мураббийлик вазифасини бажараётган Андрей Фёдоров ўз фикрларини билдириб ўтди.
– Ўйин қизиқарли бўлишини кутгандим. Баҳс фақатгина мухлисларга эмас, мураббийларга манзур келди. Бугун футболчиларнинг жисмоний ҳолатидан ташқари, руҳий ҳолати ҳам анчагина муҳим факторлардан бирига айланди. Гол ўтказиб юборганимизда, ҳисоб 1:0 вақтида, мен йигитларнинг кўзларига қараб, мағлуб бўлмаслигимизни тушундим. Барча футболчилар ўз ишини бажара олди. Дастлабки голни уриб олганимиздан кейин иккинчи марта рақиб дарвозасига йўл топишга умид қилгандик. Натижа адолатли бўлди. Бундай баҳсларда кўпроқ гол урган томон ютади. Йигитларга раҳмат айтаман. Икки жамоа ҳам майдонга чиққанидан кейин ютишни истагани яққол кўринди.
Анзур Исмоилов? Уни тиббий кўрик учун шифокор кўригига юбордик. Барчаси яқин вақтларда аниқ бўлади.
Погребняк? У бизнинг ҳавога, чиллага мослаша олмаяпти. Умид қиламанки, унинг хизматидан ҳам фойдаланамиз.
Садриддин Абдуллаев: – Чиройли ўйин бўлди. Ҳали ҳаммаси олдинда, чемпионлик учун кураш янада қаттиқроқ бўлади. Учрашувнинг бошида чарчаб қолдик, анчагина қийналдик. Ўтган турда “Пахтакор”дан бир кун кейин баҳсда қатнашгандик. Умуман олганда, бир кун катта рол ўйнайди. Чунки бизнинг тикланишимиз ҳали ўз маромига етмаганди. Кейинчалик секин-секин ўзимизга келдик ва ўйинимизни ҳам ўзгартира олдик. Тўғрисини айтсам, бошқачароқ натижа кутгандик.
“Пахтакор” менинг юрагимдаги жамоа. Бу ерда тарбияланганман. Ҳозир ҳам “Пахтакор”ни яхши кўраман, мухлислик қиламан. Энди эса бошқача ҳолат. Бошқа жамоа таркибида ўйнаб, севимли клубинга қарши ўйинда қатнашиш – бу футболнинг бир бўлаги. Барча натижа учун курашади. Чемпионлик учун курашадиган барча олти жамоада ҳам имконият бир ҳил.