“Нефтчи” – “Локомотив” (1:4) учрашувидан сўнг ўтказилган матбуот анжуманида “темирйўлчилар” жамоаси бош мураббийи вазифасини вақтинча бажарувчи Андрей Фёдоров ўйиннинг энг яхши футболчиси Сардор Рашидов ҳамрохлигида иштирок этди:
– Учрашувни у қадар фаол тарзда бошлай олмадик. Лекин вақт ўтгани сайин ташаббус биз тарафга ўтиб борди. Якунда тажриба ҳамда маҳорат ҳам ўз сўзини айтди ва биз йирик ҳисобда ғалабага эришдик. Мен мураббий бўлгач, йигитлар билан келишиб олгандим: Рақиб ким бўлишини фарқи йўқ. Ҳар бир ўйинга жиддий ва пухта тайёргарлик олиб борамиз. Шунинг учун ҳам бугунги беллашувга астойдил ҳозирлик олиб боргандик. Бу ўз самарасини кўрсатди.
Мен “Локомотив”да у қадар катта ўзгаришлар қилмадим. Бор масаллиқдан фойдаланиб, таом тайёрлашга уриняпман. Ҳозирча 4тагина ўйиндан хулоса чиқаришга эрта. Биздан мавсум сўнггига қадар яхши ўйин намойиш этиб, мухлислар, раҳбарият ишончини оқлаш талаб этилади, – деди тажрибали мутахассис.
– Ўйин осон ўтмади. “Нефтчи” жамоаси ҳам анча яхши ўйнади. Биз эса ўз ўйинимиз намойиш этишга уриндик. Биринчи бўлимда асосан рақибни ўргандик ва кейинроқ катта куч билан олдинга бориб, ғалабани ўз томонимизга оғдирдик, – деди Сардор Рашидов.
