Олдинроқ хабар берганимиздек, олий лига мусобақа жадвалида етакчилик қилаётган “Локомотив” эртага 20-турнинг қолдирилган учрашувини ўтказади. “Темирйўлчилар”га бу сафар Муборакнинг “Машъал” жамоаси рақиблик қилади.
“Локомотив” мазкур беллашувга ҳозирликни давом эттирмоқда. Ўтказилган машғулот жараёнида барча футболчилар иштирок этди. Таркибда ҳеч қандай йўқотишлар ва жароҳат олганлар йўқ. Машғулот жараёнида асосан тўп билан бажариладиган машқларга ва стандартларни аниқ амалга оширишга эътибор қаратилди.
Таъкидлаш жоизки, “Локомотив” футболчилари бугун Муборак томон йўлга чиқишади. Эртанги учрашув “Б.Вафоев” номли стадионда соат 16:00да бошланади.